«لو اختفيت يبقى بسبب أهلي».. التفاصيل الكاملة لاستغاثة فتاة بني سويف
فتاة بني سويف.. هايدي الشابوري البالغة من العمر 27 عاما، خرجت تستغيث من العنف الأسري بواسطة أمها واخواتها بعد وفاة أبيها، وحبسهم لها في مصحة نفسية للحصول على أموالها وشقتها، فيما أكدت أنها ستتخذ كل الإجراءات القانونية ضدهم وأنه في حالة اختفائها سيكون أهلها هم السبب.
فتاة بني سويف تروي تفاصيل معاناتها
وكانت فتاة بني سويف قد كتبت بالأمس عبر صفحتها على موقع التواصل الاجتماعي “فيس بوك” أنها تعرضت للأذى بواسطة أهلها بعد وفاة أبيها، خاصة بعد تقدم أحد الرجال لها ورغبتها في الزواج منه بينما رفض الأهل، وأدخلوها مصحة نفسية في محاولة للحجر عليها والاستيلاء على أموالها وشقتها.
وأوضحت هايدي المعروفة إعلاميا بـ"فتاة بني سويف" أنها تعمل محامية وبكامل قواها العقلية وهو ما أكده زملائها في العمل، وأنهم عندما سألوا أهلها عنها تحججوا بتعرضها لحادث وأنها في المستشفى وقدموا لها إجازة مرضية.
فتاة بني سويف: لن أتنازل عن حقوقي القانونية
وقالت فتاة بني سويف، إن الطبيب في المستشفى النفسي بعد تأكده من سلامة قواها العقلية والنفسية كتب لها الخروج من المستشفى بعد 30 يوما من المعاناة، وأنها حاليا تختبئ بعيدا عن بيت أهلها الذين يحاولون الوصول إليها وهي تخشى تكرار ما حدث، موجهة رسالة لكل أصدقائها عبر موقع التواصل الاجتماعي أنه في حالة اختفائها عليهم العلم أن أهلها سيكونون وراء هذا الأمر.
وأكدت فتاة بني سويف أنها تتخذ حاليا الإجراءات القانونية اللازمة لحمايتها من أسرتها وأنها لن تتنازل عن حقوقها وورثها من أبيها الذي يسعون إليه، مطالبة إياهم بتركها وشأنها، خاصة بعد تدميرهم لحياتها ولزواجها الذي كان على وشك الإتمام.
شقيق فتاة بني سويف يطالبها بالعودة
نفى شقيق هايدي فتاة بني سويف صحة ما نشرته على موقع فيس بوك، ووجَّه لها رسالة، قائلا "ارجعي يا هايدي... إحنا سندٌ لبعض، وكلُّ حاجة باسمك، وأنتِ في أمان"، مؤكدا أن الأسرة رفضت ارتباطها بشخص بعد اكتشاف أنه غير مناسب لها.
وتابع شقيق فتاة بني سويف أن ذلك الشخص اشترط أن تعمل هايدي، بينما هو لا يعمل، وأن هايدي باعت شقتها مقابل نحو 1.45 مليون جنيه، ثم اشترت شقة أخرى بمبلغ 550 ألف جنيه.
وقال شقيقها: «نحن من عائلة معروفه في الفشن والأمور كانت جيدة وكنت أقرب حد لها وشقيقتي استلمت الميراث كاملًا بعد وفاة الوالد، وتقدم أحد الأشخاص إلى شقيقتي ولا يوجد لديه مؤهل (حاصل على محو أمية) ولا يعمل وسبق له الزواج مرتين ولديه 4 أبناء وعمره 39 عام وتم رفض طلبه، وشقيقتي حاصلة على ماجستير قانون وكانت تعمل في المحكمة وتم فصلها الشهر الماضي، حاولنا منعها عن مقابلته ولكن محاولتنا فشلت، قمنا بالإبلاغ عن تغيبها منذ يومين في قسم الشرطة».
فتاة بني سويف ترد على شقيقها
ردت فتاة بني سويف على تصريحات شقيقها الذي أكد فيها أنها ارتبطت بشخص يحمل محو أمية وأنها باعت شقتها، مؤكدة أن ما نشرته سابقا جاء دفاعا عن نفسها، وأنها لن تتحدث علنًا إلا لأنها ترى أنها صاحبة حق.
وقالت هايدي، عبر حسابها على موقع «فيسبوك»، إنها لم تُفصل من عملها بالمحكمة، موضحة أن جهة عملها منحتها إجازة مرضية خلال الشهر الذي كانت فيه داخل المصحة، بينما أُبلغ زملاؤها بأنها تعرضت لحادث وتتلقى العلاج في المستشفى، على حد قولها، حتى لا يتمكن أحد من التواصل معها.
وأضافت: «ردا على رد أخويا اللي قاله، عشان صاحب الحق صوته عالي، ولو أنا غلطانة في أي حاجة حتى لو بنسبة 0.5%، مش هطلع وأتكلم، أنا متفصلتش من المحكمة، وكل زملائي هناك شاهدين على كده قدمولي إجازة مرضية الشهر ده كله عشان يحبسوني في المصحة، ولما زملائي ومدرائي في الشغل وأصحابي سألوا عليّ، قالولهم: عاملة حادثة وفي المستشفى، عشان محدش يوصلّي ولا يعرف عني حاجة».
تابعت: «ولو أنا أقرب حد ليك فعلا زي ما بتقول، كنت هتحبسني في مصحة وتدخل عليّ اتنين رجالة يكتفوني ويخدروني، وتطلب من مشرفة المصحة تديني أدوية نفسية زي المرضى، وإنت عارف وواثق إني مش مريضة، وعارف إنها بتتلف خلايا المخ؟! اللي قريبة منك دي هتدخلها المصحة، وإنت حابسها بعقودات عشان أمضي عليها وأتنازل؟! لله الأمر».
أشارت: «كان نفسي فعلا تبقى أقرب حد ليا وتحميّني بعد وفاة بابا، كان نفسي تبقى لي ضهر وسند زي ما بتقول، مش أول واحد ينهش في لحمي ويبهدلني. مخفتش عليّ من مصحة واحد مات فيها؟، أما بالنسبة للشخص اللي ذكره، ده شخص اتقدملي على سنة الله ورسوله، وأنا قبلت شخص لقيت فيه الرجولة والأمان اللي ملقتهمش وسطهم، لقيت فيه الأب اللي اتحرمت منه، ومن بعده اتبهدلت».
تابعت: «وافقوا عليه، وطلبوا منه حاجات كتير تعجز أي شخص، ومع ذلك عمل الـ99 عشاني، وأثبتلهم إنه شاريني. ولما لقوه خلص كل دنيته، وخلاص داخلين في الجد، قالولي: تعالي نشوف الفرش اللي جابه والحاجات اللي جابها. قولتلهم: يلا مفيش نص ساعة لقيت داخلين عليّ الاتنين اللي ذكرتهم في البوست اللي فات ده ميديلهمش الحق إنهم يعملوا فيا كده مهما حصل».
استكملت: «أنا نزلت البوست استغاثة، عشان بيحاولوا يوصلولي بأي طريقة عشان أتنازل عن المحضر، بيدوروا عليه، وعملوله محضر، وإخواته كلموني: أخونا بيضيع، إحنا عملنالك إيه عشان تعملي كده؟ أخويا كان بيحبك، إحنا ملناش ذنب في مشاكلك مع أهلك، أخويا هيضيع بسببكم، نزلت البوست توضيحًا إني لا مخطوفة ولا أي حاجة. أنا عاملة محضر بعدم رجوعي للبيت بسبب تعنيفهم ليا والمباحث تواصلت معايا، وقلتلهم إني مش مخطوفة، واتواصلوا على رقمي الشخصي اللي كتباه في المحضر، يعني دليل قاطع ومادي إني مش مخطوفة، وإن الشخص ده ملوش علاقة».
تابعت: «وهو هيتولى أموره مع المحامي بتاعه، لكن حسبي الله إن حد يتأذي بسببي لمجرد إنه كان متقدملي على سنة الله ورسوله أنا كل اللي بطلبه أمان، وأعيش في استقرار، عشان على الأقل أرجع أعيش حياتي طبيعي بدل المرمطة اللي بقيت فيها، وأتخطى المحنة دي ربنا ما يكتبها على حد. وأحاول أنسى الـ30 يوم عذاب اللي شوفتهم، كل يوم الأكل بميعاد، والنوم بميعاد، وحتى النفس اللي بتنفسه بميعاد».
وقالت: «دي صور رجليا وإيديا من قذارة المصحة، والبق والحشرات اللي كنت بنام جنبهم ودي صورة الشخص اللي بيقولوا عليه شهر بيا ده مش شهر بيا، ده خطيبي، وكنا هنتجوز على سنة الله ورسوله، بس أهلي قالولي: لو هتتجوزيه يبقى تتنازلي عن كل حقوقك ولما اتمسكت بحقوقي، حبسوني، أنا لو معنديش حق في كل ده، أنا ولا هنزل ولا هحكي مشكلتي أنا ليا صحاب ومعارف، وأكيد هخاف على سمعتي، بس فاض بيا خلاص».
أضافت: «أنا سايبة الحكم لله عز وجل، وفوضت أمري لله، وهمشي قانوني أنا تليفوني بفتحه أرد على صحابي أطمنهم، وأقفله تاني عشان محدش يوصلي الله أعلم هيعملوا فيا إيه، وأصحابي في الكومنتات أثبتوا إنهم سألوا عليّ كتير في غيابي، واتقالهم: دي في المستشفى وعملت حادثة، ودي صورتي الأخيرة اللي اتصورتها أول ما عملت المحضر، وقلت إني مش راجعة بسبب تعنيفهم ليا، وحاليا بيحاولو يحلو ودي ويلاقوني.. انا حاليا مش في البيت انا نزلت البلد بيحاولو يوصلولي عشان يحبسوني تاني.. وهمشي قانوني في كل حاجة.. مش طالبه اكتر من دعواتكم عشان انا لوحدي وماليش غير ربنا وعوزاكم تشيروا البوست ده عشان لو اختفيت اعرفوا ان اهلي عملو فيا حاجة انا ماليش حد يحميني بعد ربنا.. حاجة اخيره انا مش مخطوفه ذي ما بيقولو انا سايبه البيت بارادتي وعامله محضر ب ده ان انا مش هرجع بسبب تعنفهم معايا.. انا مش مخطوفة، انا لو اختفيت اتاكدوا ان اهلي اذوني وحبسوني في مصحة تاني.. ارجوكم عشان خاطر ربنا شيروا البوست في كل حتة انا مش عارفه اعمل ايه..!!".