ننشر ردود أمهات مصر على سؤال «لو كنتي وزيرة تعليم»
طرحت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، سؤالا علي أولياء الأمور من الأمهات وهو: "لو كنتي وزيرة تعليم هتتعاملي ازاي مع الدراسة والمناهج والإمتحانات في الوقت الحالي؟".
وتفاعل مئات أولياء الأمور من الأمهات علي صفحة اتحاد أمهات مصر للنهوض بالتعليم، في الفيس بوك، حيث قالت ولي ولي: "كنت هدخل الولاد من آخر شهر 8 وأخلص المنهج وأمتحنهم كمان وأكون خلصت مستريحه في شهر 12 علشان كلنا عارفين كويس جدا إن في موجه تانيه، ليه دخلنا في أكتوبر ودلوقتي بيعقبنا ولا ايه أنا مش فاهمه، بيقول الأبحاث فاشله ما احنا قولنا كده من أول ما اخد قرارها، دلوقتي هو أكتشف إنها فاشله؟!".
وأضافت ولي أمر أخري: "هعمل امتحانات online والعام القادم الدراسه تبدأ من شهر 6 وإجازة آخر العام في الشتاء حتي تنتهي الأزمة"، وتابعت أخري: "هلغي امتحانات الأنشطة، وهخلي الإمتحانات على فترات كل يوم فئة وفاصل يوم بين الفئات عشان تعقيم اللجان، اللجنة لا تزيد عن 10 طلاب والتباعد مطلوب، فحص الطلاب قبل الدخول إلى اللجان فحص فعلي مش للصورة فقط ولو الأمر ازداد خطورة سوف أؤجل الامتحانات لنهاية العام".
وذكرت أخري: "هلغى أجزاء من المنهج وهعمل امتحانات بسرعه فى الجزء اللى اتاخد مع طبعا الإجراءات الإحترازية وهلغى امتحان المواد الغير مضافه للمجموع زى الكمبيوتر والرسم"، واستكملت أخري: "هخصص جزء من المناهج للإطلاع، وهعمل اختبارات تحريريه للمواد اللي بتتضاف بس في المجموع
وهعجل بمواعيد الإمتحانات، هعمل تباعد في اللجان كل مرحله لها أيام
وتتوزع أعداد الطلبه علي كل المدرسه كل فصل لا يزيد عن 15 طالب بالمشرفين، وأوجه بتطبيق الإجراءات الإحترازيه وانبه علي التفتيش الدوري اليومي من الإدارات للمدارس وتحويل أي مقصر للتحقيق الفوري وأمل زيارات مفاجئه للمدارس في المحافظات مش بس في القاهره طول فترة الامتحانات.. وهدي للناس فرصه اللي مش عاوز اولاده ينزلوا الامتحانات بدل ما الوزير يقول الولاد يعيدوا السنه ممكن يدخلوا الامتحانات دور تاني في الصيف".
وأضافت أخري: "هرفع الغياب وهسيب خيار الحضور أو الأون لاين اختيارى، والتقييم اون لاين او بحث للترم الأول وامتحان الفينال هخليه فى يونيو يكون الذروه انتهت مع الغاء أجزاء من المنهج اللى كلها حشو ونركز علي الأساسيات بس"، وقالت أخري: "أولا غلق المدارس والإعتماد على القنوات التعليمية والإنترنت، ثانيا عمل أبحاث وأنشطة دورية كل شهر يتم تسليمها في المدرسة أو عن طريق الانترنت لتقييم الطلاب وتأجيل الإمتحانات لحين توفر اللقاحات أو عندما يخف حدة إنتشار المرض".
وتابعت ولي أمر أخري: "الوزير غلط جدا فى تأخير ميعاد الدراسه مع إن الجميع كان بيحذر إن شهر 12 وشهر 1 هيكونوا من أصعب الشهور للأسف هو حط نفسه فى موقف صعب عاوز يكمل وكلنا كان نفسنا ولادنا يمتحنوا ونفرح بنجاحهم ونحس بنتيجه تعبنا وفى نفس الوقت الوضع أصبح من أسوأ ما يكون، ربنا يستر على الجميع، اللهم ارفع مقتك وغضبك عنا اللهم ارفع البلاء والوباء عنا ياارحم الراحمين".
