"ذنبي ايه".. طالب صفر اللغة العربية يوجه رسالة لوزير التعليم

وجه طالب بالثانوية العامة يدعي  يوسف محسن، الذي حصل علي صفر في اللغة العربية بامتحانات الثانوية رغم حصوله علي مجموع جيد في باقي المواد استغاثة عاجلة لوزير التربية والتعليم والتعليم الفني .

وقال الطالب في استغاثته التي نشرها علي صفحته علي الفيس بوك "انا اسمي يوسف محسن  من مدرسه جمال عبد الناصر  غرب الفيوم جبت 64 %  وجبت في امتحان العربي صفر وحصل معايا ان كنت مسلم ورقتين للبابل شيت وعامل محضر بده زي ما المدرس قالي  انا  قولت للمراقبة انا غلطت  في سؤال اعمل ايه ادتني بابل شيت قالتلي حل فيه السؤال ده بس وهندبس الاتنين في بعض ومعاهم المحضر ".

وأضاف في استغاثته،:" والمحضر مكنش بتبديل بابل شيت لا انا كنت كاتب ان عندي سوالين غلط وتم نقلهم في بابل شيت اخر علي حسب تعليمات المدرس بالكلام اللي هكتبه انا معرفش ازاي اكتب محضر انا كتبت الي قاله .. ولما سالت دلوقتي  كذا  مدرس قالوا بيروح ورقه واحده والتانيه بتتبعت كتالف ومدرسين قالوا بتتقطع  بس وده مش اللي مضيت عليه ولا كتبته ف المحضر المحضر اتعمل  ومضيت علي اساس ما قاله مراقب اللجنة قالي عليه واللي انا كاتبه بايدي ف المحضر". 

واكمل  :" وكتبت المحضر اني نقلت اجابه السؤال ده ف بابل شيت تاني ومضيت عليه والمراقب كنت قولتله طيب ينفع يبقي ليا اتنين قالي طالما معمول محضر اثبات حاله خلاص وكان في اخر الوقت وقالي يلا عشان الوقت خلص وانا كنت اول مره في حياتي امتحن بابل شيت ولسه معرفش اي حاجه ف مشيت ورا كلام المدرس الي هو اكيد فاهم اكتر مني  ودلوقتي لقيت اني جايب  صفر ف معني كده ان الورقة الي هي فيها سوال واحد الي راحت  واتصححت ومع العلم المدرس قالي هيروح الاتنين طالما عملت محضر  ".

واختتم الطالب :" فهل ذنبي اني مشيت ورا كلام المراقب الي اصلا مخلنيش انقل غير سوالين بس ولو سابني انا كنت هنقل كله بس المراقب والمراقبه كانوا واقفين جنبي عايزين يلموا الورقه وخلاص".

من جانبها، قالت مصادر بديوان عام وزارة التربية والتعليم والتعليم الفني أن الوزارة تتابع ما نشر علي مواقع السوشيال ميديا وسيتم التحقيق فيما قاله الطالب واذا كان له حق سوف يحصل عليه .