«أمهات مصر» لـ«شوقي»: لاحنا بتوع كوافيرات ولا نوادي ولا عيالنا داخلين انترناشونال

استنكرت عبير أحمد مؤسس اتحاد أمهات مصر للنهوض بالتعليم، تصريحات الدكتور طارق شوقي وزير التعليم، أمس الثلاثاء، والتي ذكر فيها "أمهات مصر"، قائلاً: "عايشين 24 ساعة علي الفيس بوك، يعني أنهن مش فاضيين لتربية أولادهم".

وأضافت عبير، في بيان صادر عن الاتحاد، أن تصريحات الوزير إهانة وإساءة لا نقبلها، مؤكدة أن أمهات مصر يعانون أشد المعاناة من أجل تربية وتعليم أبنائهم ويتواجدون علي الفيس بوك لمتابعة قرارات الوزارة وتحميل مذكرات ومراجعات للأبناء.

وطالبت عبير، وزير التعليم بضبط النفس وعدم الإساءة لأولياء الأمور من الأمهات أو الأساءة لأبنائهم واتهامهم بعدم التربية، مؤكدة أن أولياء الأمور شريك أساسي في العملية التعليمية.

وأشارت إلي أن تصريحات الوزير تعتبر إهانة واضحة لكل أم ويجب تقديم اعتذار لهن، مستطردة: "المفروض يشكرهم علي التعب اللي بيتعبوه مع أبنائهم بدل الإساءة والهجوم عليهم".

وتفاعل أولياء الأمور من الأمهات علي صفحة اتحاد أمهات مصر للنهوض بالتعليم، في الفيس بوك، مهاجمين وزير التعليم علي تصريحاته، حيث قالت ولي أمر: "انت لو تعرف الأمهات بتعانى ازاى فى تربية ومذاكرة الأولاد وظروف كل بيت، حسبى الله ونعم الوكيل، احنا مش زى الستات اللي فى الكوافير والنادى وبتحضر حفلات عمرو دياب"، وتابعت أخري: "اه عندك حق بأماره المواعين والغدا والعشاء والمكوى والدروس والمذاكره والامتحانات، فعلا احنا فاضين عقبالك يارب مايرزقك زى مارزقنا".

وذكرت ولي أمر: "أمهات مصر خط أحمر، لن نقبل منك اهانه، عجزك وفشلك الواضحين خلاك معندكش غير الأهانات"، وأضافت ولي أمر أخري: "قاعدين علي الفيس نتابع تصريحاتك المتضاربة اللي طالعه كل ساعه، هو فيه مسئول بيصرح تصريح كل ٦ ساعات وكل تصريح يضرب اللي قبله، التابلت اول السنه لا التابلت في البحر لا التابلت في نوفمبر لا مافيش تابلت، مين اللي فاضى للتصريحات والمشروعات الفاشلة، هو بيهين الأمهات وبيقول علي ولادنا مش متربيين؟".

وتابعت، "احنا بنربي أولادنا أحسن من أي حد في الدنيا، واحنا أكتر ناس متمرطه ما بين مدرسه ودروس وتمارين علشان يبقو أحسن ناس، ويارب ياااارب يرزقك بنفس اللي عندنا علشان تحس بينا، مش فاهمه ازاي الرئيس السيسي سايبه كده يهين فينا بالرغم انه هو أكتر واحد حاسس بالست المصرية، ودايماً رافعنا لفوق وعارف إن احنا قد المسؤلية.. لا احنا من الستات اللي ماسكه الفيس 24 ساعه زي ما بتقول، ولا احنا بنروح كوافيرات ونوادي وسايبين أولادنا في مدارس انترناشونال اللي انتم مدخلين فيها أولادكم".

كان الدكتور طارق شوقي وزير التربية والتعليم استنكر خلال مؤتمر الأسبوع الأول للتنمية المستدامة الذي تنظمه الأكاديمية العربية للعلوم والتكنولوجيا والنقل البحري،  موقف أمهات مصر اللائي وصفهن بأنهن يعيشون 24 ساعة على الفيس، وأنهن لا يهتمون لتربية أولادهم.