أستاذ علم نفس بجامعة عين شمس: "يابنت خلي عندك شوية كرامة"

قال الدكتور جمال الشرقاوي أستاذ علم النفس بجامعة عين شمس، إن الحب في أساسه كرامة واحترام النفس، موجها حديثه للبنات قائلا "ما هو مش معقول كده خلي عندك شوية كرامة يابنت أنك تحسي أنك بتحبيه نقول مفيش مشكلة إنك تشعري بميل عاطفي ناحيته نقول مفيش مشكلة أنك تعتبرية نصك وشريك حياتك المستقبلي نقول مفيش مشكلة، وأن قلبك كل ماتيجي سيرته أو تسمعي صوته أو تشوفي شكلة يدق يدق لدرجة أن قلبك هيتخلع من كتر حبك ليه بردو نقول مفيش مشكلة".

 

وأضاف الشرقاوي، قائلا "لكن أنك تجري وراه وتطارديه علشان تلفتي نظره، أهو كده بقى خرجتي ياروح ماما عن النص، وأنك تعملي ألاعيب شيحة وتنصبي المهرجانات علشان تلفتي نظرة ويبادلك الحب، أهو كده الطريق بقى صحراوي مش زراعي، وأنك تفضلي طول الوقت بتحاولي تشدي انتباهه ليكي كده يبقى انتي عايشة الوهم".

 

وتابع الشرقاوي، قائلا "لازم تعرفي ياحبيبتي أن الشاب لو بس حس أو لاحظ أن البنت ميتة فيه ومدلوقة وواقعة عليه ساعتها إما بيهرب منها لواحدة تانية تكون مورياه الويل أو يتقل عليها وفرصة يعيش الدور على قفاها وفرصة كمان يحس طول الوقت أنه مرغوب ومحبوب، حبوا بكرامه وعزة نفس لأن الحب في أساسه كرامة واحترام للنفس".