نائب رئيس جامعة عين شمس يوجه رسالة لراقصي الـ"كيكي"

علق الدكتور فتحي الشرقاوي نائب رئيس جامعة عين شمس لشئون التعليم والطلاب، علي الفيديوهات الراقصة المعروفة بتحدي "كيكي"، قائلا "أخر موجات الهبل والهطل والعبط في الشارع المصري، ان الواحد يبقى سايق عربيته في امان الله وفجاة والدنيا زحمة يقوم نازل هو وعياله ومراته وهاتك يا رقص وهز الوسط، رقص بضمير ومن اللي قلبك يحبه، وياسلام لو كانت الرقصة بلدي تبقى طبلت وطينت".

وتابع الشرقاوي، على صفحته الشخصية علي موقع التواصل الاجتماعى "فيس بوك"، قائلا "بالذمة في هبل وعبط أكتر من كده، وياسلام بقى لو حد بيحب مراته قوي، وحب يفرح قلبها برقصة الكيكي دي، والله عيب اللي بيحصل ده"، موجها حديثه لراقصي "كيكي" قائلا "عيب اختشوا ما يصحش كده".

وأضاف الشرقاوي، قائلا "طيب لو واحد زي حالتي من بيئة متوسطة وغلبانة وما بيعرفش يرقص الرقص الايقاعي على المزيكا الهادية والرومانسية يعمل ايه بقى ساعتها، أكيد هيرقص على انغام مزمار عبدالسلام أو انغام مهرجانات التكاتك واوكا واورتيجا، وياسلام على الخمسات والسبعات، وشغل المطاوي والسافوريا والبشلة والسنجه، يعني البلد كلها هتبقى صالة ديسكو واللي ما يشتري يتفرج".